A yau Lahadi, 7 ga watan Mayu ne shugaban kasa Muhammadu Buhari zai karbi bakuncin ‘yan matan Chibok 82 da aka ceto a jiya.

An ceto’ yan matan ne bayan da aka yi musayar su da wasu firsunonin Boko Haram da gwamnati ke rike da su.

Wannan ya na kunshe ne a wata sanarwa da nai magana da yawun shugaban kasa, Mallam Garba Shehu ya fitar a daren jiya Asabar.

Yanzu haka adadin ‘yan matan da gwamnati ta ceto ya haura dari, idan aka hada da 21 da aka ceto a baya.

Sama da shekaru 3 kenan tunda mayakan Boko Haram suka sace ‘yan mata fiye da 200 a makarantar sakandiren Chibok da ke jahar Borno.

Garba Shehu ya bayyana cewa jami’an tsaron Nijeriya sun shafe watanni suna yarjejeniya da mayakan kafin a cimma wannan nasara.

Ya ce shugaba Buhari ya na mika godiyar sa garesu da gwamnatin Switzerland, kungiyar Red Cross, da kungiyoyi masu zaman kansu na gida da na waje.